തിരുമുടിമാലയിലെയൊരുദളം പൂവായി-
ജനിക്കുവാനുള്ള ഭാഗ്യം ലഭിച്ചുവെങ്കിൽ!
തിരുനെറ്റിത്തടത്തിൽ നീയണിയുന്ന ചന്ദനത്തി-
ന്നൊരു ചെറുകണികയായ് പിറന്നെങ്കിൽ!
തവ മയിൽ പീലിയിലെയൊരു ചെറുയിഴയായി-
കമലനയനാ! ഞാനും ജനിച്ചെങ്കിൽ!
തവ പാദപത്മങ്ങൾ തഴുകിടും തുളസിപ്പൂ-
വതിലൊരു ദളമായ് ഞാൻ പിറന്നെങ്കിൽ!
അരുമയാമരഞ്ഞാണമതിലൊരു കണ്ണിയായി-
പിറവിയെടുക്കാനെനിക്കായെങ്കിൽ!
മധുരമാ മുരളിയിലൊരുനാദമാകുവാൻ
-മുരളീധരാ! എനിക്കു കഴിഞ്ഞെങ്കിൽ!
തവ പീതവസനത്തി ലൊരുതന്തുവായിട്ടു-
പിറക്കുവാനുള്ള ഭാഗ്യം ലഭിച്ചെങ്കിൽ!
തിരു ചേവടികൾ തൻ സ്പർശന ധന്യതയാർ-
ന്നൊരു പാദധൂളിയായി തീർന്നെങ്കിൽ!
തവ കയ്യിൽ സമർപ്പിക്കും നറുവെണ്ണയതിലൊരു-
ചെറിയൊരു ഭാഗമാകാൻ കഴിഞ്ഞെങ്കിൽ!
ഗുരുപുരാധിപദേവ! നവനീതകൃഷ്ണ! കണ്ണാ!
മമ ജന്മം ധന്യമാമെന്നറിയും ഞാൻ